Ditzionàriu in línia
de sa limba e de sa cultura sarda

acicài, acicàre , vrb: antzicai, assicai, assicare, assicari, atzicai, atzicare Definizione pigare assíchidu, tènnere o fàere assuconu Sinonimi e contrari aliventare, apramare, asciuconare, asciustrare, apundhorare, aterrighinare, arviai, ilgirare, ispramai, isprauriri, istrementire, isturdinare Modi di dire csn: a. de o po ccn. cosa; acicaisí a morti = meda, de ndhe mòrrere; èssiri nàsciu atzicau = si narat de chie est sempre atontadu, sempre pessendhe a crabas Frasi dhus connòsciu bèni, ita genti funt, ma no tocat a si ndi atzicai! ◊ mi ndi seu assicau! ◊ dòngiu cropus a sa gàbbia po ndi dha fai assicari e po dh'atrudiri, a sa papagalledha ◊ iscieis ca si ndi podit antzicai, candu est dormida?! 2. torret su sàmbene a chie est assicau! Etimo srd. Traduzioni Francese effrayer Inglese to frighten Spagnolo asustar Italiano spaventare Tedesco erschrecken.

adumbrài, adumbràre , vrb: aumbrare Definizione tímere, fàere a tímere meda, fàere o pigare assíchidu Sinonimi e contrari abbabbarrotai, addojare, arreselai, assuconare, assumbrae, impupuridhare, isumbrare, umbrai / timire Frasi s'àinu, comente fit colendhe at bidu una pupa e si est aumbradu ◊ sa malasorte de sos àteros calchi bolta ti tocat intro e ti aumbrat sa mente ◊ che crapola aumbrada de canes de catza curriat a sa tzeca 2. si ti ponzo manu a fuste ti aumbro! 3. apo aumbradu de no m'iscobiare Etimo ltn. ad umbrare Traduzioni Francese effrayer Inglese to frighten Spagnolo asustar, asustarse Italiano spaventare, spaventarsi Tedesco erschrecken, scheuen.

alvinàre , vrb: avrinare Definizione pigare frina (ingòllere cosa mala), zúghere sos bundhos, ispramare, pigare assíchidu malu Sinonimi e contrari acicai, arviai, spramai Frasi e fintzas custu séculu avrinadu in nues de fumu abboghinendhe iscràdiat in sos fundhales grogos de s'última mania (L.Mele) 2. su pisedhu, asciuconadu malamente, che fit cúrridu avrinendhe a coas de sa mama ◊ sa morte los at fatos avrinare: che los at dados suta unu càmiu ◊ timia che a sa frea e mi ponia a cúrrere avrinadu Etimo srd. Traduzioni Francese effrayer Inglese to frighten, to be obsessed Spagnolo espantar, estar obseso Italiano spaventare, èssere ossèsso Tedesco erschrecken, besessen sein.

apantarjàre , vrb Definizione fàere sa sprama, fàere pigare assíchidu malu Sinonimi e contrari apantarjare, asciuconare, asciustrare, aterrighinare, atimorilgiai, impagurire, ispramai, ispreare, istrementire, stremessiri Traduzioni Francese épouvanter Inglese to frighten Spagnolo asustar Italiano impaurire, terrorizzare Tedesco einschüchtern, erschrecken.

apantaviàre , vrb Definizione fàere a tímere meda, pigare assíchidu Sinonimi e contrari apantejare, apramare, apupurrare, asciuconare, asciustrare, aterrighinare, ispramai, istrementire, isturdinare Frasi faghent tzocos e sonos chi apantàviant totu sos de sa leada ◊ bidindhe a Maria Intaulada si sunt apantaviados totu Traduzioni Francese effrayer Inglese to frighten heavily Spagnolo aterrorizar Italiano intimorire forteménte Tedesco verängstigen.

apantejàre , vrb Definizione pigare assíchidu, tímere, fàere a tímere Sinonimi e contrari apramare, asciuconare, asciustrare, aterrighinare, ilgirare, ispramai, istrementire, stremessiri Frasi si est apantejatu canno at intesu carabbineris ◊ sos fitzos sont apantejatos videnne su babbu goi male vogliatu ◊ si apantejat a su cantu de s'istria ◊ custu l'ant imbentatu pro apantejare sos pitzinnos chi cherent essire a denote Etimo srd. Traduzioni Francese épouvanter Inglese to frighten Spagnolo asustar Italiano spaventare Tedesco erschrecken.

asciustràre , vrb: assustai, assustare, assustrae, assustrai, assustrare, assustrari Definizione fàere a tímere meda, fàere pigare assíchidu, assuconu mannu, timoria meda; pigare o pònnere isarcu Sinonimi e contrari acicai, asciuconare, assalciare, assantiare, aterrighinare, ilgirare, ispramai, isprauriri, istrementire, isturdinare, spetziai, stremessiri / isarcare Frasi no vos asciustredas, no apades de tímere! ◊ oscura s'aera che inferru betat lampos chi assustant su terrinu (A.Dettori)◊ raramente timo, ma istanote mi so assustrau ◊ bidindhe sos bandhidos si est assustada ◊ assustradedhu mi ndi seu!… 2. assustrat una cosa chi no s'ischit fàchere Etimo spn. Traduzioni Francese effrayer Inglese to frighten Spagnolo asustar Italiano spaurire Tedesco erschrecken.

assaltanàre , vrb: assaltinare Definizione fàere assicare a giagaradura / sonnu assaltinadu = avolotadu, assolocadu Sinonimi e contrari acicai, asciuconare, asciustrare, aterrighinare, ispantamare, ispramai, issaltanare, istrementire Frasi càglia, chi mi assaltanas! Etimo srd. Traduzioni Francese épouvanter, agiter Inglese to frighten, to upset Spagnolo asustar Italiano spaventare, agitare Tedesco erschrecken.

spaurài , vrb Definizione fàere a tímere Sinonimi e contrari apantarjare, apramare, asciuconare, asciustrare, aterrighinare, impagurire, istrementire, stremessiri | ctr. aminare, incoragire, incorai Traduzioni Francese épouvanter Inglese to frighten Spagnolo asustar Italiano impaurire Tedesco ängstigen.